شعری از میرزاعلی اکبر صابر تقدیم به ستارخان

حال مجذوبوم گؤروب، قاره ، دئمه دیوانه دیر،
نعره شوریده می ظن ائتمه بیر افسانه دیر،
شاعرم، طبعیم دنیز، شعر تریم دردانه دیر،
بهجتیم ، عیشیم ، سروروم، وجدیم احرارانه دیر،
انجذابیم جرات مردانه مردانه دیر،
آفرینیم همت والای ستارخانه دیر،

تاکی، ملت مجمعین تهراندا ویران ائتدیلر،
تورک لر ستارخان ایله عهد و پیمان ائتدیلر،
ظلم استبداده قارشی نفرت اعلان ائتدیلر،
ملته، میللیته جان نقدی قوربان ائتدیلر،
آیه ذبح عظیم اطلاقی او قوربانه دیر،
آفرینیم همت والای ستارخانه دیر،

حق مددکار اولدو آذربایجان اتراکینا،
آل قاجارین پروتئست ائتدیلر ضحاکینا،
او شهیدانین سلام اولسون روان پاکینا،
کیم ، توکولموش قانلاری تبریز وتهران خاکینا،
اونلارین جنت دئییلدیر منزلی، آیا نه دیر؟
آفرینیم همت والای ستارخانه دیر .

ایشته ستارخان، باخیز بیر نوع اقدامات ائدیب،
بیر وزیر و شاهی یوخ، دونیانی یکسر مات ائدیب،
عرض اسلامی، وطن ناموسونو یوز قات ائدیب،
حرمت و حیثیت و ملتینین اثبات ائدیب،
ایندی دونیانین توجه نقطه سی ایرانه دیر،
آفرینیم همت والای ستارخانه دیر.

ایشته ستارخان، باخیز، ایرانی احیا ائیله دی،
تورک لوک، ایرانلی لیق تکلیفین ایفا ائیله دی،
بیر رشادت ، بیر هنر گؤستردی، دعوا ائیله دی،
دولتین بیر عینی نی دونیاده رسوا ائیله دی،
قاچماییب پروانه تک اوددان، دئمه ، پروا ، نه دیر؟
آفرینیم همت والای ستارخانه دیر.

آفرین، تبریزیان ، ائتدیز عجب عهده وفا !
دوست و دوشمن ال چالیب ائیلرسیزه صد مرحبا !
چوخ یاشا ، دولتلی ستارخان ، افندیم ، چوخ یاشا !
جنت اعلا ده پیغمبر سیزه ائیلر دوعا،
چون بو خدمتلر بوتون اسلامه دیر، ایرانه دیر،
آفرینیم همت والای ستارخانه دیر.